首页 > 报纸波经 > 太阳报>  正文
2020-02-15 本文来源:互联网
杜塞失双中坚仲嗌攻
周六晚德甲尾场上演莱茵河打吡,尾3杜塞尔多夫主场迎战4哥慕逊加柏,杜塞尔多夫两大最强中坚一伤一停,但新帅罗斯拿仍然扬言要抢攻,力争佢上任后首场德甲胜仗,啱晒质高兼蓄锐嘅慕逊加柏打快攻,慕逊加柏作客让半一,黑柴撑上盘。(Now 670、FOX+、有线651及611台周日凌晨1时30分直播)

杜塞尔多夫较早前炒咗功勳老帅芬基,搵嚟51岁嘅前曼城德国名宿罗斯拿接掌帅印,佢上任后两场德甲分别赛和法兰克福同禾夫斯堡,睇到球员精神面貌积极咗,但无法作出质素嘅改变,上仗闷和缺态嘅禾堡水准甚低,赛后罗斯拿亦对前线唔收货,认为今仗喺主场应该以3分为目标,但佢哋今季德甲场均入球不足1个,係18支德甲火力最差1队,焗攻反而会令防线空虚。

更致命嘅係今仗主力中坚安德里荷夫曼停赛,呢季表现最好嘅另一中坚卡恩阿耶汉上轮伤出,赶及复出机会唔高,要用上仗临危受命,后备入替首度喺德甲登场嘅真卡佐真逊顶档,呢位歇冬期至由费伦巴治借番嚟嘅29岁新兵原本仲处于适应期,今晚旨意佢喺防线领军相当牙烟。

尼奥侯斯倒戈战意坚
慕逊加柏上周末原本要踢另一场莱茵河打吡,但对科隆嘅赛事因为风暴改期,不过呢支首循环大部分时间做1哥嘅劲旅,并冇因为咁而偷懒,教练马高路斯要求加操,针对近期作客欠佳问题力图改善,佢哋两周前作客赛和RB莱比锡已见进步,尤其该仗被安排由攻中改任防中嘅科利安尼奥侯斯,表现大受好评,呢位22岁天才中场前季曾被慕逊加柏外借畀杜塞杜尔夫,仲帮助该队由德乙升上德甲,今仗重临旧地扬言要为球队取得今年首场作客胜仗。慕逊加柏虽然都有前线柏利亚坐波监,但有足够级数嘅比列安保路顶佢,加上中场基拉马同守将赞迪斯基都伤愈复出,兵源同争胜决心更足。