首页 > 报纸波经 > 太阳报>  正文
2019-08-03 本文来源:互联网
增兵劲积极 有备而来
新一季德甲两周后至开锣,多蒙特同拜仁慕尼黑今晚会率先喺德国超级盃较量。多蒙特增兵早着先鞭,上季结束后已密密签人,转会费支出达1亿2,750万欧元(约11亿港元),打破球会史上纪录;相反拜仁除上季尾已确定加盟嘅卢卡斯靴南迪斯同班捷文柏华特外,喺转会市场冇大作为,实力同兵源都有所下滑,作客西法伦球场冇本钱让波,多蒙特受让平半,黑柴捧下盘。
(Now 671、有线651及612台周日凌晨2时30分直播)
多蒙特今夏疯狂烧钱,除签下尼高舒侯斯同祖利安白兰特两名现役德国国脚,引入比利时国脚杜根夏萨特,同买断上季入球效率极高嘅射手柏高艾卡沙外,更成功撬走拜仁老将晓姆斯回巢,此举除稳定防线外,亦直接削弱争霸对手实力,难怪连拜仁功勳教头轩历基斯都话,唔明拜仁点解肯制。
拜仁转会优柔寡断
拜仁「2R」洛宾同列贝利齐齐离队,成个暑期买人处处碰壁,既优柔寡断又悭住荷包,多个目标人物好似马菲斯迪历特、迪姆华拿同赫臣奥杜尔等都拒绝加盟,近月苦苦追求喺利莱辛尼亦未搞掂,难怪球迷甚至球员都对球会高层嘅办事效率诈晒型。
两军季前热身赛演出唔曳,多蒙特赢过利物浦;拜仁就击败过皇马同AC米兰,但相比下拜仁表现较反覆,而且一双翼锋基拿比同京士利高文都喺奥迪盃受轻伤,就算上阵状态亦未必弗,防中查维马天尼斯更完全冇喺近期热身赛落场,新援卢卡斯靴南迪斯亦养伤当中。多蒙特虽然都有新援祖利安白兰特同杜根夏萨特因伤缺阵,但兵源仍在拜仁之上,主场受让值博。