首页 > 报纸波经 > 太阳报>  正文
2019-07-08 本文来源:互联网
今晚上演最后2仗非国盃16强赛事,其中尾场有「黑星」加纳硬撼突尼西亚。突尼西亚今届仍未开斋表现令人失望,最大问题係攻力疲弱,加纳前线靠阿休兄弟亦见吃力,因此近期兴玩拉布,半场和值得再追。
(myTV Gold 302、now 639、有线655及615台周二凌晨3时直播)
突尼西亚一向攻力麻麻,今届非国盃将进攻中场卡斯里推前一格,但呢位喺圣伊天同样「装假9」表现突出嘅王牌,返到国家队因缺乏供应,变得孤掌难鸣,喺E组分组赛次轮对马里嘅入波,只係射罚球省中人牆改变方向破网,难怪今届成队波入得两粒咁大把,仲要3场分组赛全部打和未赢过,咁样都攞到次名出线,真係大话夹好彩。
冷敲马里「第一队入球」
另一边厢,加纳虽然喺F组以首名出线,但3仗只得1胜2和,表现唔算出色,尤其係老将基恩严重跌Watt,今届只曾两次后备入替兼食白果,前线惟有倚重阿休同佐敦阿休担大旗,2人合共入3粒,不过单靠佢哋两兄弟孭飞,其他队友行行企企,咁样蛇都死喇。而且「黑星」最锺意玩拉布,连同热身赛在内,近5仗有4次开半场和,今仗仲要係淘汰赛,相信于初段会更加保守,半场和不妨追多铺。
至于头场马里对科特迪瓦,讲牌面梗係「大象兵团」更胜一筹,喺D组分组赛取得2胜1负,但佢哋前线过于倚赖水晶宫翼锋韦费特沙夏,容易畀人冻结。
相反,冇球星嘅马里擅打整体战,喺E组分组赛以2胜1和首名晋级,而且3场均先入波,证明擅长先发制人,加上近4次交手,亦有3次先开纪录,既然咁抢缰,冷敲马里「第一队入球」更上算。
(myTV Gold 301、now 638、有线654及614台周二凌晨零时直播)